ഈ കാലഘട്ടത്തില് വ്യാപകമായി കണ്ടുവരുന്ന അസുഖമാണ് മറവിരോഗം അഥവാ അല്ഷിമേഴ്സ്. പ്രധാനമായും പ്രായമായവരിലാണ് അല്ഷിമേഴ്സ് കണ്ടുവരുന്നതെങ്കിലും ചെറുപ്പക്കാര്ക്കും ഈ അസുഖം പിടിപെടാമെന്നാണ് വിദഗ്ദ്ധര് പറയുന്നത്. എന്നാല് മല്സ്യം, ചിക്കന്, സലാഡ്, വിവിധതരം പരിപ്പുകള് എന്നിവ കഴിക്കുന്നവര്ക്ക് അല്ഷിമേഴ്സും മറ്റ് മറവിസംബന്ധമായ അസുഖങ്ങളും പിടിപെടാനുള്ള സാധ്യത കുറവാണെന്ന് റിപ്പോര്ട്ട്.
അമേരിക്കന് അക്കാദമി ഓഫ് ന്യൂറോളജിയുടെ ഓണ്ലൈന് മെഡിക്കല് ജേര്ണലായ ന്യൂറോളജിയിലാണ് ഇതുസംബന്ധിച്ച റിപ്പോര്ട്ട് പ്രസിദ്ധീകരിച്ചത്. ന്യൂയോര്ക്കിലെ കൊളംബിയ സര്വ്വകലാശാല മെഡിക്കല് സെന്ററിലെ നിക്കോളാസ് സ്കാര്മിയാസ് നടത്തിയ പഠനത്തെ ഉദ്ധരിച്ചാണ് ഈ റിപ്പോര്ട്ട് പ്രസിദ്ധീകരിച്ചിരിക്കുന്നത്.
മല്സ്യം, ചിക്കന്, സലാഡ്, വിവിധതരം പരിപ്പുകള് എന്നിവയില് അടങ്ങിയിട്ടുള്ള ഒമേഗ ത്രി ഫാറ്റി ആസിഡ് രക്തത്തിലെ ബീറ്റ അമിലോയ്ഡിന്റെ അളവ് കുറയ്ക്കാന് സഹായിക്കുന്നു. അല്ഷിമേഴ്സ് പോലെയുള്ള മറവിരോഗങ്ങള്ക്ക് പ്രധാനകാരണം രക്തത്തിലെ ബീറ്റ അമിലോയ്ഡിന്റെ അളവ് കൂടുന്നതാണെന്ന് നേരത്തെ കണ്ടെത്തിയിട്ടുണ്ട്. 65 വയസിന് മുകളില് പ്രായമുള്ള 1219 പേരിലാണ് പഠനം നടത്തിയത്. 1.2 വര്ഷം മേല്പ്പറഞ്ഞ ഭക്ഷണമാണ് ഇവര്ക്ക് നല്കിയത്. ഇതിലൂടെ ഇവര്ക്ക് മറവിസംബന്ധമായ ഡെമന്ഷ്യ എന്ന അസുഖത്തില് നിന്ന് മോചിതരാകാന് സാധിച്ചിട്ടുണ്ട്. ഒമേഗ ത്രീ ഫാറ്റി ആസിഡിന് പുറമെ വിറ്റാമിന് ഇ, സി, ബി12, ഡി, ബീറ്റ-കരോട്ടിന് എന്നിവ അടങ്ങിയ ഭക്ഷണമാണ് ഇവര്ക്ക് നല്കിയത്. ഇതുവഴി രക്തത്തിലെ ബീറ്റ അമിലോയ്ഡിന്റെ അളവ് ഗണ്യമായി കുറഞ്ഞതായും പരിശോധനയില് തെളിഞ്ഞിട്ടുണ്ട്. ദിവസേന ഒരു ഗ്രാംഒമേഗ ത്രീ ഫാറ്റി ആസിഡ് ശരീരത്തില് എത്തുന്നതുവഴി രക്തത്തിലെ ബീറ്റ അമിലോയ്ഡിന്റെ അളവ് 20-30 ശതമാനം വരെ കുറയ്ക്കാനാകും.
No comments:
Post a Comment